Трамп кеча Зеленскийнинг Вашингтонга ташрифини бекор қилмоқчи бўлган, аммо Макрон уни учрашувга кўндирган – BFMTV
АҚШ президенти Доналд Трамп аввалроқ Украина президенти Володимир Зеленскийнинг Вашингтонга ташриф буюришини «мақсадга мувофиқ эмас» деб ҳисоблаган. Чоршанба куни Украина раҳбари Оқ уйдан АҚШга келмаслик бўйича тавсия олган.
Шундан сўнг, Зеленский Франция президенти Эммануэл Макрон билан боғланган. Макрон эса Трампга қўнғироқ қилиб, Украина президенти билан учрашувни шахсан кафолатлаши мумкинлигини айтган.
Бунинг ортидан Трамп ўз қарорини ўзгартириб, Зеленский билан учрашишга рози бўлди ва расман бу ҳақда эълон қилди.
Эслатиб ўтамиз, кеча кундузи Зеленский АҚШга ташрифи борасида ҳали аниқ қарор қабул қилинмаганини билдирган эди. Аммо кечга бориб, у Вашингтонга сафар қилишини расман тасдиқлади.
Ташриф давомида “Фойдали қазилмалар бўйича” битим имзоланиши кутилмоқда. Бироқ Украинада эълон қилинган битимнинг сўнгги вариантида аниқ шартлар ва Қўшма Штатлар томонидан аввал тақдим этилган ёрдам маблағларини қайтариш кафолатларини ўз ичига олмаган. Доналд Трамп эса ушбу маблағларни қайтаришни «битимнинг асосий мақсади» деб ҳисоблашда давом этмоқда.
