Россия бензин экспортига тақиқни узайтирди
Россия ҳукумати бензин экспортига қўйилган тақиқни 31 августгача узайтирди. Вазирлар Маҳкамасининг Телеграм каналида эълон қилинган маълумотга кўра, қарор аллақачон имзоланган.
Чекловлар бевосита ёқилғи ишлаб чиқарувчилар томонидан амалга ошириладиган етказиб беришларга тегишли эмас.
Ҳукумат маълум қилишича, бу тадбир «ички ёқилғи бозорида барқарорликни таъминлаш, нефтни қайта ишлаш саноатини қўллаб-қувватлаш ва бензиннинг норасмий экспортини чеклаш» мақсадида амалга оширилмоқда.
Шунга ўхшаш тақиқ 2024 йил февралда жорий этилган ва дастлаб 1 мартдан 31 августгача амал қилиши режалаштирилган эди. Бироқ май ойи бошида ички бозор барқарорлашгани ва Украина дронлари ҳужумидан зарар кўрган нефтни қайта ишлаш заводларидаги таъмирлаш ишлари якунланганидан сўнг чекловлар бекор қилинган эди. Сентябрь ойида ҳукумат тақиқни қайта жорий этди. Ҳозирги чекловлар 28 февралда ўз кучини йўқотади.
Украина дронлари Россиядаги нефть қайта ишлаш заводларини бир неча бор нишонга олиб, уларни вақтинчалик тўхтатишга мажбур қилди. Февраль ойи ўрталарида Россия Бош вазири ўринбосари Александр Новак бир қатор нефть қайта ишлаш заводларига қилинган ҳужумлар ва кейинги таъмирлаш ишларига қарамай, мамлакат ички ёқилғи ишлаб чиқариши барқарор эканлигини маълум қилди.
Февраль ойида «Коммерсант» газетасига интервью берган мутахассислар бозорни барқарор деб баҳолаган бўлса-да, баҳорда нефть қайта ишлаш заводларининг мавсумий таъмирланиши сабабли ички ёқилғи нархлари кўтарилиши мумкинлиги ҳақида огоҳлантирган эди.
