Европа Иттифоқи-АҚШ муносабатлари тўхтаб қолдими?
АҚШ Давлат котиби Марко Рубио Европа Иттифоқи дипломатияси раҳбари Кая Каллас билан режалаштирилган учрашувни бекор қилди ва уни қуйи даражадаги расмийлар билан музокаралар олиб боришга мажбур қилди.
Каллас аввалроқ Рубио билан учрашув ҳақида очиқчасига эълон қилиб, Украинадаги уруш ва “трансатлантика муносабатлари”ни муҳокама қилишини айтган эди. 24 феврал куни у «АҚШнинг янги маъмурияти билан алоқа ўрнатиш» учун Вашингтонга кетаётганини эълон қилди ва Европа ва Украина тинчлик музокараларида иштирок этиши кераклигини таъкидлади.
Бироқ, кейинроқ маълум бўлишича, Рубио жамоаси Каллас аллақачон АҚШга учиб кетганидан сўнг, «жадвал билан боғлиқ муаммолар» ҳақида хабар берган. Шуниси эътиборга лойиқки, Давлат котибининг 26-февралдаги очиқ жадвалига унинг учрашуви киритилмаган ва унинг ягона расмий тадбири соат 11:00 да Оқ уйда бўлиб ўтган Вазирлар Маҳкамаси йиғилиши бўлган.
Учрашув бекор қилингандан сўнг, Каллас жамоаси ташрифини тўғирлашини эълон қилди: у энди АҚШ сенаторлари ва Конгресс аъзолари билан музокаралар олиб боради, шунингдек, Гудзон институтидаги тадбирда нутқ сўзлайди.
Каллас аввалроқ президент Доналд Трампнинг Кремл билан музокараларга ёндашувини танқид қилиб, уни Россияга нисбатан ҳаддан ташқари юмшоқлик деб атаган эди. Баъзи кузатувчиларнинг таъкидлашича, АҚШ Европа Иттифоқининг мураккаб ва суст дипломатик тизимидан қочиб, алоҳида давлатлар билан икки томонлама музокараларни тобора кўпроқ афзал кўрмоқда.
