Афғонистон-Покистон чегарасида кескинлик: қуролли тўқнашувлар юз берди

Рамазон ойининг иккинчи куни Афғонистон ва Покистон чегарасида жойлашган «Торхам» назорат-ўтказиш пункти яқинида икки давлат чегарачилари ўртасида қуролли тўқнашув содир бўлди. Натижада бир афғон чегарачиси ҳалок бўлган, икки покистонлик эса яраланган.

Гувоҳларнинг хабар беришича, отишмалар бошланганидан сўнг, маҳаллий аҳоли хавфли ҳудуддан кетишга мажбур бўлган. «Торхам» пункти Афғонистон ва Покистон ўртасидаги энг муҳим савдо йўлакларидан бири бўлиб, ушбу кескинлик икки давлат ўртасидаги муносабатларга салбий таъсир кўрсатиши мумкин.

Сўнгги пайтларда чегара ҳудудида бир неча марта қуролли тўқнашувлар қайд этилган. Манбаларга кўра, Покистон томони Афғонистоннинг шарқий қисмига авиаҳужум уюштирган бўлиб, бу ҳам кескинликни янада кучайтирган.

Чегарадаги вазият кескин бўлиб қолмоқда. Мазкур можаронинг келгуси оқибатлари икки давлат ўртасидаги муносабатларга қандай таъсир қилиши ҳали номаълум.