Винисиус «Реал»дан қанча пул олмоқчи эканлиги маълум бўлди
Винисиус Жуниор «Реал»да йилига камида 20 миллион евро ишлаб топишни хоҳлаяпти.
Бразилия миллий жамоаси вингерининг амалдаги шартномаси 2027 йил ёзигача мўлжалланган. Футболчи ва клуб мавсум якунига етгач, ёзда янги музокараларни бошлайди. Шунингдек, футболчига Саудия Арабистонидан беш йил учун 1 миллиард евролик таклиф бор.
2022 йилда имзоланган битимга кўра, Винисиус шартнома муддати давомида солиқлардан ташқари 75 миллион евро ишлаб олиши керак. Бу эса ўртача йилига 15 миллион евро дегани. Аммо унинг маоши йилдан йилга ошиб бориши кўзда тутилган.
Шартномада шахсий мукофотлар учун турли бонуслар ҳам белгиланган. Масалан, The Best совринини қўлга киритганидан сўнг Винисиус 2 миллион евро бонус олган. Агар у “Олтин тўп”ни ютса, худди шундай мукофотга эга бўлади.
Ҳозирда Винисиус ўртача йилига 15 миллион евро маош олмоқда, бу Килиан Мбаппенинг даромадига тенг. Янги шартномага кўра, «Реал»нинг еттинчи рақамли ўйинчиси йилига камида 5 миллион евро кўпроқ маош олишни хоҳлаяпти. Клуб унинг талабларидан хабардор.
