Марказий Осиё давлатлари Хитойнинг ҳаво ҳужумидан ҳимоя тизимларига қизиқиш билдирмоқда
Тожикистон расмийлари Хитойдан HQ-17AE замонавий зенит-ракетасини қабул қилиб олганини эълон қилди. Тожикистон ушбу янги ҳаво ҳимоя тизимини илк бор Қуролли кучларининг 32 йиллигига бағишланган ҳарбий парадда намойиш қилди.
Тадбирда тўртта жанговар машина ва икки транспорт-юклаш машинаси кўрсатилди, бу эса Тожикистон ва Хитой ўртасидаги ҳарбий ҳамкорликнинг мустаҳкамланаётганидан далолат беради.
Ушбу тизим 1,5 дан 15 км гача бўлган масофада нишонларни йўқ қилиш қобилиятига ва 10 метрдан 10 км гача бўлган баландликда ишлаш диапазонига эга бўлиб, унда Россияга оид муқобилига нисбатан бироз устунлик мавжудлигини кўрсатади. Тизим 2013 йилда расман Хитой Халқ-озодлик армиясининг қуролланишига қабул қилинган ва 2015 йилда хитойлик ҳарбийлар томонидан оммавий равишда эътироф этилган.
Сўнгги йилларда Марказий Осиё давлатлари Хитойнинг мудофаа саноати маҳсулотларига қизиқишни оширмоқда. Аввалроқ Ўзбекистон ҳам Хитойдан FM-90 ва KS-1C ҳаво ҳужумидан ҳимоя тизимларини сотиб олганини маълум қилганди. FM-90 ракета тизими мобиллиги ва юқори аниқлиги билан ажралиб туради, KS-1C эса ўрта масофадаги ракета ҳужумларига қарши ҳимояни таъминлайди.
Экспертларнинг таъкидлашича, минтақадаги давлатлар мудофаа имкониятларини кучайтириш мақсадида анъанавий ҳамкорлар билан бирга Хитой ҳарбий техникасига ҳам эътибор қарата бошламоқда. Бу жараён глобал геосиёсий ўзгаришлар ва ҳарбий технологиялар бозоридаги рақобат билан боғлиқ экани айтилмоқда.
