Трамп Гренландияни куч билан қўшиб олмоқчи
АҚШ президенти Дональд Трампнинг АҚШ ҳудудини кенгайтириш борасидаги ниятлари жиддий, Оқ уй раҳбари Гренландияни ҳарбий йўл билан қўшиб олиш вариантини истисно қилмаяпти.
Бу ҳақда The Wall Street Journal нашри манбаларга таяниб хабар берди.
АҚШ маъмурияти вакиллари Даниянинг оролда Америка контингентини кўпайтириш, шунингдек, АҚШнинг тоғ-конь компаниялари билан шартномалар тузиш бўйича таклифлари учун очиқ эканликларини айтишди, бироқ Трамп «Гренландияга эгалик қилиш истагида жиддий ва уни қўлга киритишнинг ҳарбий йўлларини истисно қилишдан бош тортмоқда.»
Суҳбатдошлардан бирининг таъкидлашича, Оқ уйда Вашингтон Гренландияни қандай қилиб қўлга киритиши мумкинлиги муҳокама қилинмоқда.
Панамадаги сиёсий вазиятдан хабардор манба маълум қилишича, мамлакат ҳукумати Панама канали устидан суверенитетни сақлаб қолган ҳолда Америка раҳбарини ҳар қандай йўл билан тинчлантиришга уринмоқда. Унинг айтишича, Оқ уй панамалик ҳамкорлар аллақачон берган ён беришлардан мамнун, бироқ Трамп ҳамон «канални АҚШга қайтариш» ниятидан қайтмаяпти.
Wall Street Journal хабар беришича, Трамп янги ҳудудларни қўшиб олиш ниятининг жиддийлигини таъкидлаш мақсадида февраль ойида Овал кабинетга АҚШнинг 11-президенти Жеймс Полкнинг портретини осиб қўйган. Полк ўзининг олий давлат лавозимидаги ягона муддатида АҚШ ҳудудини деярли икки бараварга кенгайтиришга эришган бўлиб, мамлакат таркибига АҚШнинг жануби-ғарбий қисми, Техас, Калифорния ва Орегонни қўшиб олган эди.
Ўшанда Вашингтон маъмуриятининг амалдаги раҳбари Оқ уй меҳмонларига Полкка қойил қолишини айтган, чунки у «кўп ер қўлга киритган». Газетанинг аниқлаштиршича, республикачи илгари Капитолийда осилган портретни АҚШ Конгрессидан олиб, президент қароргоҳида осилган АҚШ президенти Томас Жефферсоннинг портретларидан бирига алмаштириб олган.
