Тошкентда йўловчилардан нақд пул талаб қилган ҳайдовчи ишдан айрилди
Ижтимоий тармоқларда тарқалган Тошкент шаҳридаги 72-сонли йўналишда ҳаракатланувчи автобус ҳайдовчиси ҳамда соҳага бегона бўлган фуқаро томонидан йўловчилардан йўл ҳақи учун нақд пул талаб қилгани билан боғлиқ ҳодиса юзасидан расмий маълумот берилди.
Қайд этилишича, икки «уддабурон» шу куни кеч соат 19:50ларда йўналишда ҳаракатланиш давомида автобус салонининг чироқларини ўчирган ҳолда йўловчилардан йўл ҳақи учун нақд пул талаб қилган.
«Тошшаҳартрансхизмат» АЖ ахборот хизмати берган маълумотга кўра, жорий йил 14 март куни, «2-Автобус саройи» филиали масъул ходимлари томонидан автобус салонига ўрнатилган видеокузатув мосламалари текширилганда юқорида келтирилган ҳолат ҳақиқатда содир бўлганлиги маълум бўлган.
Шу куни ҳолат юзасидан автобус саройи ходимлари ҳамда масъуллари иштирокида тезкор танқидий йиғилиш ўтказилган. Йиғилишда ҳайдовчи Ж.Х.нинг содир этган қоидабузарлиги муҳокама қилиниб, корхона ички тартиб интизомини ўта қўпол равишда бузганлиги учун у билан тузилган меҳнат шартномаси бекор қилинди.
Шунингдек, мазкур ҳолат бўйича ҳайдовчининг содир этган қоидабузарлигига ҳуқуқий баҳо олиш мақсадида, ҳужжатлар тўплами ҳуқуқ-тартибот органларига тақдим этилган.
