Россия Суриянинг янги ҳукуматига илк бор нефт етказиб берди
Сурияга Россия нефти юкланган Aquaticа танкери етиб келди. Маҳаллий SANA ахборот агентлиги хабарига кўра, Башар Асад режими ағдарилгандан кейинги биринчи нефт танкери Банияс денгиз терминалига келган. Банияс Ўрта ер денгизи қирғоғида жойлашган ва Суриядаги энг йирик нефтни қайта ишлаш заводига эга шаҳар ҳисобланади.
Reuters агентлигининг ёзишича, Aquatica бортида айнан Россия нефти бор. Шунингдек, 25 март куни Sakina номли яна бир нефт танкери Баниясга етиб келишини хабар қилган. Иккала кема ҳам АҚШ президенти Жо Байден маъмурияти томонидан жорий этилган санкциялар рўйхатга киритилган.
Reuters маълумотига кўра, ҳозирги пайтда Дамашқ учун халқаро бозорда нефт етказиб берувчи шерик топиш жуда қийин ҳисобланади. Сабаби, ҳали Асад ҳокимиятда бўлган пайтда Қўшма Штатлар ва Европа Иттифоқи Сурияга нефт етказиб беришни тақиқловчи санкцияларни жорий қилган эди. Яқинда бу чекловлар бироз юмшатилган бўлса-да, халқаро нефт трейдерлари ҳамон Дамашқ билан савдо қилишдан ўзини тиймоқда, чунки санкциявий ва молиявий хавфлар хозиргача сақланиб қолмоқда.
