Путин яна бир йил уруша олади
Россия президенти Владимир Путин Украина билан урушни армиянинг ҳозирги йўқотишлари даражасида яна 12-16 ой давом эттириши мумкин.
Бу фикрни Американинг Урушни ўрганиш институти (ISW) нинг Россия бўйича бош эксперти Жорж Баррос New York Post газетасига берган интервьюсида билдирди.
Барроснинг таъкидлашича, тахминан бир йилдан сўнг ҳарбий ҳаракатларни молиялаштириш учун бюджет захиралари ҳам, ҳукуматнинг фронт учун «кўнгиллилар» топиш имкониятлари ҳам тугаб қолиши мумкин.
Ҳозирги кунда Россия ҳудудлари ҳар куни 1-1,5 минг кишини урушга жалб қилмоқда, уларни ўртача миқдори 1,4 миллион рубль бўлган сахий бонуслар билан қизиқтирмоқда. Бу НАТОнинг баҳолашича, ҳар ойда 30-45 минг киши ва уруш бошланганидан бери 900 мингдан ортиқ кишини ташкил этадиган фронт йўқотишларини қоплаш имконини бермоқда. Аммо Барроснинг таъкидлашича, ҳокимият армияга сафарбарлик суръатини чексиз давом эттира олмайди: улар ҳали фронтга юборилмаган эркакларнинг «қисқараётган демографик базасини овлаш» учун мукофотларни оширишни давом эттиришга мажбур бўлади ва пировардида бу сиёсат бюджет муаммоларига дуч келади.
