Трампнинг сўнгги талаби: Қрим – Россияга ва яна…
АҚШ президенти Доналд Трамп, Қрим Россия-Украина уруши тугагандан кейин ҳам Россия назоратида қолади, деб ҳисоблайди.
«Қрим ҳақида гапириш мажбуриятидамиз, чунки у доимо тилга олинади. Қрим Россия таркибида қолади. Украина президенти Владимир Зеленский ҳам, бошқалар ҳам буни тушунади, Қрим узоқ вақтдан бери Россия билан бирга эканлигини билишади,» – деди АҚШ президенти Time журнали билан суҳбатда.
Трамп Владимир Путин ва Владимир Зеленский билан тинчлик келишувига эришиш мумкинлигига ҳамон ишонишини таъкидлади.
Америка раҳбари Украинанинг НАТОга аъзо бўлиш нияти ҳақида гапирар экан, бунинг ҳеч қачон амалга ошмаслиги эҳтимолини билдирди.
«Менимча, украиналиклар НАТОга қўшилиш ҳақида гапира бошлагани урушнинг бошланишига сабаб бўлди. Агар улар бу мавзуни кўтармаганида, уруш бошланмаслиги эҳтимоли анча юқори бўларди,» – деди Трамп.
