Пентагон журналистлар учун ёпилди
Reuters агентлигининг ёзишича, АҚШ мудофаа вазири Пит Ҳегсет Пентагон биноларида журналистларнинг эркин ҳаракатланишига чек қўювчи янги фармон чиқарди. Унга кўра, матбуот вакиллари эндиликда кўплаб ҳарбий иншоотларга махсус рухсатсиз кира олмайди. Ҳегсет бу қарорни “махфий разведка маълумотларини ҳимоя қилиш зарурияти” билан изоҳлади.
Аммо бу қарор АҚШда матбуот эркинлиги учун хавотирли ҳолат сифатида баҳоланмоқда. Пентагон Матбуот Уюшмаси янги тартибга кескин муносабат билдириб, бундай чеклов “матбуот эркинлигига тўғридан-тўғри таҳдид” эканини таъкидлади.
“Журналистлар Пентагоннинг махфий бўлмаган ҳудудларига ўнлаб йиллар давомида, ҳар хил сиёсий маъмуриятлар даврида, жумладан, 2001 йил 11 сентябрь воқеаларидан сўнг ҳам ҳеч қандай хавфсизлик эътирозисиз эркин кира олишган. Эндиликда бу анъана бузилмоқда”, — дейилади баёнотда.
Манбаларга кўра, Ҳегсетнинг бу қарори фақат хавфсизлик масаласи билан эмас, балки ОАВ билан узоқ давом этаётган зиддиятлар билан ҳам боғлиқ. У илгари ҳам бир неча бор журналистларни ўзига қарши “фитна уюштиришда” айблаган. Бу ҳолат, айниқса, Сигнал мессенжерида расмийлар ўртасидаги махфий суҳбатларнинг сизиб чиқиши билан боғлиқ муаммолар фонида кучайган.
