“Анорбанк” раҳбари Парижда ўғирлаб кетилди
23 июнь куни «Анорбанк»нинг асосий акционери Қаҳрамон Олимов Франциянинг Париж шаҳрида ўғирлаб кетилган. Бу ҳақда Le Monde нашри хабар тарқатди.
Нашрнинг ёзишича, Ницца яқинида жойлашган вилладаги икки кунлик тутқунликдан сўнг тўланган гаров пули эвазига қўйиб юборилган.
Ўзбек банкири озод қилингач, дарҳол шифохонага мурожаат қилган. Тиббий текширувдан сўнг танасида кўплаб кўкаришлар ва жисмоний шикастланишлар борлиги аниқланган.
Гап шундаки, 48 ёшли банкир Франциянинг EDF компанияси билан ҳамкорликда Сурхондарё вилоятида газ циклли электр станцияси қурилишида иштирок этмоқда. У Парижга айни шу лойиҳа доирасида француз ҳамкорлари билан учрашиш мақсадида борган.
“Анорбанк” расмийси ростан ҳам шундай ҳодиса рўй берганини тасдиқлади ва Олимов озодликка чиқиш учун ўз шахсий пулларини ишлатгани, банкка омонот қўйган мижозларнинг пули ишлатилмаганини билдирди.
