Ирландиялик аёл Фаластин митингида Берлин полициясининг ҳаракатлари ҳақида гапирди
Берлиндаги Фаластин тарафдорлари митинги пайтида полициячи томонидан муштланиб, қўли ва бурни синган ирландиялик Китти О’Брайен Германия намойишчиларга нисбатан қилган муомаласи учун халқаро қораловга дуч келиши кераклигини билдирди.
25 ёшли фаолнинг айтишича, 28 август куни бўлиб ўтган намойишда полициячи юзига икки марта мушт урган, натижада бурни ва қўли синган, шунингдек, радиал асаби шикастланган. У бир ҳафта касалхонада даволанишга мажбур бўлган.
О’Брайеннинг таъкидлашича, сўнгги икки йил ичида немис полицияси фаластинпарвар фаолларга нисбатан ҳаддан ташқари куч ишлатган. Унинг сўзларига кўра, “Фаластиндаги геноцид давом этаётгани учун” фаолларнинг овозини ўчиришга уринишлар натижа бермаяпти.
Аввалроқ, 28 август куни Берлин полицияси Ғазода ҳалок бўлган журналистларни ёдга олиш учун тўпланган 200 га яқин намойишчини тарқатиб юборган, саккиз киши ҳибсга олинган эди. О’Брайеннинг муштланиши акс этган тасвирлар эса жамоатчиликда катта муҳокамаларга сабаб бўлди.
