Фернандеш ёзда Саудия клубларидан келган учта таклифни рад этган

Португалиялик футболчи бу ёзда Саудия клубларидан келган учта таклифни рад этган. Клублар ўртасидаги жаҳон чемпионати олдидан «Ал Ҳилол» Фернандешни олиш учун фаол ҳаракат қилган.

Хабарларга кўра, «Ал Ҳилол» Фернандеш рози бўлганида 80 миллион фунт стерлингдан ортиқ пул тўлашга тайёр бўлган. Шунингдек, португалиялик яримҳимоячига Криштиану Роналдунинг клуби «Ан Наср» ҳам қизиқиш билдирган ва июл охирида норасмий таклиф йўллаган.

Айрим норасмий хабарларга кўра, Роналду клубнинг трансфер сиёсатини шахсан назорат қила бошлаган. Лекин Фернандешнинг ўзи Криштиану билан гаплашиб, камида бир йил Европада қолиш ниятини айтган.

Қолаверса, футболчи «Ал Иттиҳод» вариантига ҳам қизиқиш билдирмаган. Шу билан бирга, у 2026 йил ёзда Саудияга кўчиб ўтиш эҳтимолини инкор қилмаяпти.