Мусиқа мияни қаришдан қандай ҳимоя қилади?
Янги тадқиқот шуни кўрсатдики, мунтазам равишда мусиқа тинглаш ёки мусиқа асбобларини чалиш кекса одамларга деменция хавфини камайтиришга ва когнитив функцияларнинг пасайишини секинлаштиришга ёрдам беради.
Австралиялик олимлар ўн йил давомида 70 ва ундан катта ёшдаги 10 мингдан ортиқ соғлом одамларнинг маълумотларини ўрганиб чиқди, деб ёзади Washington Post. Деярли ҳар куни мусиқа тинглаганлар камроқ фаол тингловчилар билан солиштирганда деменция ривожланиш эҳтимолини 39 фоизга камайтирди. Шу билан бирга, тадқиқотда мусиқанинг айнан қайси жанри афзал кўрилгани кўрсатилмаган.
Тадқиқот ўтказилган ASPREE Longitudinal Study of Elder Persons лойиҳаси иштирокчиларнинг саломатлик ҳолатини ва турмуш тарзининг турли омилларининг касалликлар ривожланишига таъсирини кузатди. «Мусиқа бизни қизиқтирган мавзулардан бири эди,» – деди тадқиқот раҳбари, нейропсихиатрия ва деменция бўйича мутахассис Жоан Раян.
Мутахассислар ҳар йили иштирокчиларнинг когнитив функцияларини текшириб, фаол мусиқа тингловчилари хотира ва глобал когнитив тестларда юқори натижа кўрсатганини аниқладилар. Шу билан бирга, чолғу асбобларини мунтазам чаладиган мусиқачилар ҳам фойда кўрдилар – уларда деменция хавфини камайтириш тахминан 35 фоизни ташкил этди.
Мутахассисларнинг таъкидлашича, мия саломатлигини яхшилаш учун мусиқа асбобини чалишни ўрганиш шарт эмас. Ҳатто севимли куйларни оддий тинглаш ҳам когнитив функцияларни рағбатлантириши, кайфиятни яхшилаши ва миянинг турли соҳаларини фаоллаштириши мумкин.
