Бенин Қурролли Кучлари давлат тўнтаришига уринишни барбод қилди
Бенин Қурролли Кучлари давлат тўнтаришига уринишни барбод қилди — Бенин президенти Патрис Талон.
«Бу фақат телевидениени назорат қилаётган кичик бир гуруҳ. Мунтазам армия назоратни тикламоқда. Пойтахт ва бутун мамлакат тўлиқ хавфсизликда», дейилади Бенин президенти офисининг AFP агентлигига берган изоҳида.
Мамлакат Ташқи ишлар вазирлигининг маълум қилишича, президентга содиқ кучлар бир неча соат ичида ҳокимият устидан назоратни қайтариб олган.
Маҳаллий оммавий ахборот воситаларига кўра, бир гуруҳ ҳарбийлар миллий телевидение биносида қуршаб олинган, улар телеканал ходимларини гаровда ушлаб турибди.
Давлат тўнтаришига уринишга бошчилик қилаётган подполковник Паскал Тигри бошчилигидаги ҳарбийлар Бениндаги вазиятни ўз назоратлари остида ушлаб туришганини даъво қилишмоқда.
67 ёшли президент Талоннинг иккинчи ваколат муддати 2026 йил баҳорида тугайди. Навбатдаги президентлик сайловлари апрел ойида бўлиб ўтиши керак. Талон 2016 йилги сайловлар натижасида ҳокимиятга келганди. У учинчи муддатга сайланмасликка ваъда берган ва ўз ворисини ҳам маълум қилганди.
