Трамп Украинадаги урушни тугатиш учун катта ютуқларга эришганини эълон қилди
АҚШ президенти Дональд Трамп Россия-Украина урушини ҳал қилишда сезиларли ютуқларга эришилганини маълум қилди.
Бу ҳақда Америка етакчиси хоккей бўйича АҚШ миллий терма жамоасида 1980 йилги Олимпиада чемпионларига фахрий медалларни топшириш маросимида айтиб ўтган.
«Биз кўп иш қилдик, саккизта урушни тўхтатдик. Ҳали биттаси қолди ва мен буни энг осон ҳал қилиш деб ўйладим, бу Россия ва Украина уруши. Лекин биз жуда кўп ютуқларга эришдик», деди у.
Трамп ҳозирча келишувга эришиш мумкинми ёки йўқми, устида ишлаётганини қўшимча қилди.
«Кўрамиз. Эҳтимол, тез орада билиб оламиз», деди Америка раҳбари.
Аввалроқ Буюк Британия бош вазири Кир Стармер бельгиялик ҳамкасби Барт де Вевер билан учрашувда Украина келажаги учун бурилиш нуқтаси ҳақида гапирган эди.
