Самарқандда эркак қарийб 200 грамм михни ютиб юборди

Самарқанд вилоятида 29 ёшли эркак ошқозонига ёт жисмлар тушиб кетгани сабабли шошилинч тиббий ёрдамга мурожаат қилди. Республика шошилинч тиббий ёрдам илмий марказининг вилоят филиалига фуқаро қорин соҳасидаги кучли оғриқлар билан олиб келинган.

Марказ ахборот хизматининг маълум қилишича, шошилинч қабул бўлимида ўтказилган диагностик ва лаборатор текширувлар натижасида беморнинг ошқозон-ичак тизимида кўп миқдорда металл буюмлар — мих ва саморезлар борлиги аниқланган.

Шифокорлар беморга зудлик билан жарроҳлик амалиёти ўтказиш зарурлиги ҳақида хулоса чиқарган. Олий тоифали шифокор Йўлдош Қулиев раҳбарлигида барча зарур тайёргарлик ишлари амалга оширилиб, лапаротомия ва гастростомия усулида операция ўтказилган.

Жарроҳлик амалиёти давомида беморнинг ошқозонидан умумий оғирлиги қарийб 200 граммни ташкил этувчи металл жисмлар олиб ташланган. Операция бир соатга яқин вақт давом этган.

Ҳозирда беморнинг аҳволи қониқарли баҳоланмоқда, у мустақил ҳаракатлана олади ва шифокорлар назорати остида даволанишни давом эттирмоқда.

Аниқланишича, фуқаро кучли стресс ҳолатида бўлган ва ўз ҳаракатларини назорат қила олмаган ҳолда металл буюмларни ютиб юборган.