221 тоннадан ортиқ йирик олтин конлари топилди
Саудия Арабистони йирик олтин конлари топилганини эълон қилди. Саудия Арабистони кончилик компанияси (Мааден) маълумотларига кўра, мамлакатнинг тўртта ҳудудида умумий захираси 7,8 миллион унсияга тенг (тахминан 221 тоннадан зиёд ) бўлган янги олтин конлари аниқланган.
Ушбу кашфиёт «Мааден» компаниясининг ички минерал ресурслар базасини кенгайтиришга қаратилган фаол қидирув ишлари ва кенг кўламли бурғулаш амалиётлари натижасида амалга оширилди.
Янги ресурслар бир нечта ҳудудларни қамраб олган бўлиб, Марказий Арабистон олтин минтақасининг (Cентрал Арабиан Голд Регион) ортиб бораётган салоҳиятини намоён этади.
Расмийларнинг таъкидлашича, ушбу топилмалар Саудия Арабистонининг тоғ-кон саноати соҳасидаги узоқ муддатли стратегиясини мустаҳкамлайди ва мамлакатнинг глобал кончилик марказига айланиш мақсадини қўллаб-қувватлайди. Шунингдек, бу кашфиёт бутун мамлакат бўйлаб олтин, мис ва никел қазиб олишни ривожлантириш учун янги имкониятлар очади.
