Япония томонидан Россия агрессиясига қарши киритилган санкциялар кўлами маълум қилинди
Япония Россиянинг Украинага босқинини тўхтатиш, адолатли ва барқарор тинчликни ўрнатиш мақсадида санкциялар қўлламоқда. Бу ҳақда Япония ташқи ишлар вазирлиги мулозими Xabar.uz мухбирига маълум қилди.
«2025 йил сентябрь ойи ҳолатига кўра, 1017 та жисмоний шахс, 370 та ташкилот, 17 та банк каби Россия субъектлари маблағлари музлатилган. 561 та ташкилот экспортига тақиқ қўйилган. Шунингдек, учинчи давлатлардаги (14 мамлакат ва битта минтақа) бир қатор субъектларга ҳам маблағни музлатиш ва экспорт тақиқи чоралари татбиқ этилган», – дейди ТИВ вакили.
Санкциялар хронологиясига эътибор қаратилса, 2022 йил февраль ойида Украина уруши бошланганидаёқ Россиянинг бир қатор давлат амалдорлари, жумладан, президент Владимир Путин ва ташқи ишлар вазири Сергей Лавров, олигархлар, ҳарбийларга тегишли маблағлар музлатилган. Молиявий санкциялар қўлланган, Россиядан муайян маҳсулотлар экспорти ман этилган.
2022 йил апрелдан кейин энергетика секторида Россияга қарамликни камайтириш мақсадида расмий Токио рус кўмири ва нефти импортидан босқичма-босқич воз кечишга киришган. Россиядан муайян товарлар импорти ман этилган.
2025 йил сентябрь ойидан санкцияларни айланиб ўтишга уринишларнинг олдини олиш мақсадида учинчи давлатлардаги ташкилотларга қарши чоралар кўрила бошлаган. Шунингдек, яна бошқа қатор таъсир усуллари татбиқ этилмоқда.
Қайд этилишича, Япония санкциялар бўйича халқаро ҳамжамият билан ҳамкорлик қилар экан, Украина муаммосини ҳал этишга ўз ҳиссасини қўшишни истайди.
Россия босқини бошланган илк кезлардаёқ расмий Токио Украина суверенитети ва ҳудудий яхлитлиги бузилиши, халқаро ҳуқуқ ҳамда БМТ Низоми поймол этилишини кескин қоралаган ҳамда Кремлдан ҳужумни зудлик билан тўхтатиш ва ўз қўшинини Россия ҳудудига қайтаришни талаб қилган.
Япония Россияга қарши санкциялар бўйича халқаро ҳамжамият, хусусан, «Катта еттилик» давлатлари билан яқиндан ҳамкорлик қилиб келади.
Япония Украинага молиявий, иқтисодий, техник ва гуманитар йўналишларда ҳам кўмак кўрсатмоқда. Сиёсий ва дипломатик дастак орқали эса расмий Токио халқаро ҳуқуқ устуворлиги принципини илгари сурмоқда.
Кунчиқар ўлка Украинани тиклаш ва реконструкция қилиш бўйича саъй-ҳаракатларни фаоллаштириш ниятини ҳам билдирган.
