“Microsoft”да фаррош бўлиб ишлаётган бўлардим!..
Бир одам Microsoft компаниясига фаррош бўлиб ишлаш учун келди.
Улар унга бир нечта саволларни, асосий тестларни беришди ва ниҳоят айтишди:
– Табриклаймиз, сиз ишга қабул қилиндингиз. Бизга электрон почта манзилингизни қолдиринг ва биз сизга иш жадвалингизни юборамиз.
– Аслида… Менда компютер йўқ, электрон почта у ёқда турсин, – тан олди эркак.
Ходимлар менежери қошларини чимирди:
– Кечирасиз, жаноб, лекин агар сизда электрон почта манзили бўлмаса, демак сиз бизнинг тизимимизда мавжуд бўлмайсиз. Компанияда ишлаш учун электрон ёзишмалар жуда зарур.
Эркак чўнтагидаги атиги 30 доллар билан ҳафсаласи пир бўлганча чиқиб кетди. Аммо у ўзига ачиниб ўтирмади: деҳқондан 20 фунт олма сотиб олди, гавжум чорраҳага борди ва “янги органик мевалар”ни сотишни бошлади.
Бир неча соат ичида у пулини икки баравар кўпайтирди. Кун охирига бориб, уларни ўн баравар оширди. Ва кейин у англаб етди – эҳтимол унга хўжайин умуман керак эмасдир.
Вақт ўтди. У кичик юк машинасини сотиб олди, аввалига мева-чева пештахтасини, кейин кичик озиқ-овқат дўконини очди. Беш йил ўтгач, у бутун супермаркетлар тармоғига эга бўлди.
Бир куни бизнесини суғурта қилаётганда агент ундан сўради:
– Сизга энг яхши таклифларни юборишимиз учун электрон почта манзилингизни бера оласизми?
– Менда компютер йўқ. Ёки электрон почта, – деб жавоб берди тадбиркор.
Aгент ажабланиб кўзларини пирпиратди:
– Шошманг-шошманг… Сиз бутун империяни компютерсиз қурдингизми? Агар сизда компютер бўлса, нималарга эришишингиз мумкинлигини тасаввур қила оласизми?!
Эркак жилмайди:
– Ҳа. Мен “Microsoft”да фаррош бўлиб ишлаётган бўлардим.
Сабрина Аллаярова
