Ким 12 жойни 24 кишига сотибди?! Centrum Air’нинг Урганч—Тошкент рейсига 12 йўловчи “сиғмай” қолди..
Урганч халқаро аэропортидан Тошкентга учиши керак бўлган Centrum Air авиакомпаниясининг C6089 рейсига қўлида чиптаси бўлган 12 нафар йўловчи «жой тугаб қолгани» учун қўйилмади.
Жорий йил 5 феврал куни соат 8:30 да Centrum Air’дан Урганч—Тошкент йўналишига чипта олган йўловчиларга рейс соат 9:10 га кўчирилгани ҳақида тунда хабар берилган. Рўйхатга олиш соат 8:25 гача амал қилиши билдирилган. Бироқ аэропортга 8:10 атрофида етиб келган айрим йўловчиларга “самолётда жой қолмагани” айтилган. Йўловчилардан бирининг таъкидлашича, рейсдан қолганлар орасида операцияга, давлат имтиҳонларига ёки халқаро уланма (трансфер) рейсларга кетаётган фуқаролар ҳам бўлган. У чиптани авиакомпаниянинг расмий сайти орқали харид қилганини айтади.
Кейин маълум бўлишича, учиши лозим бўлган самолётда техник носозлик аниқланган. Ва у зудлик билан сиғими кичироғига алмаштирилган. Қолган 12 киши ҳам кўчада қолмаган. Уларга ҳам турли вариантлар таклиф қилинган. Ва компания ходимининг маълум қилишича муаммо бартараф этилган… Ҳеч ким битта жойга иккита чипта сотмаган. Тамом.
