Зеленский: Урушни айнан Россия якунлаши керак
Украина президенти Владимир Зеленскийнинг айтишича, Украина урушни бошламаган ва уни тугатиш масъулияти Россия зиммасида. Бу ҳақда у Москва ва Киев ўртасидаги можарони ҳал этиш бўйича музокара гуруҳи билан учрашув якунларига бағишланган Telegramдаги баёнотида маълум қилди.
Зеленский таъкидлашича, Украина учун асосий мақсад — аниқ натижа ва барқарор тинчлик бўлиб, бу самарали хавфсизлик кафолатларисиз мумкин эмас. У шерик давлатларни, жумладан АҚШни, тинчлик йўлида фаолликни сақлашга чақирди ва қўллаб-қувватлагани учун миннатдорлик билдирди.
Шунингдек, у музокаралар доираси, кейинги қадамлар жадвали ва яқин вақтда янги учрашувлар ўтказиш имкониятлари муҳокама қилинганини, аммо янада кўпроқ илгарилаш зарурлигини қайд этди.
