Чинозда вояга етмаган қизга шилқимлик қилган 51 ёшли эркак 3 суткага қамалди
Тошкент вилояти Чиноз туманида 51 ёшли эркак вояга етмаган, 9-синфда ўқийдиган қизни мактабдан уйига қайтаётган вақтида безовта қилган. У қизнинг йўлини тўсиб, аввал қўл телефонини созлаб беришини сўраган, кейин эса орқасидан эргашиб, қаерда яшаши, кимнинг қизи экани ва исми ҳақида саволлар берган.
Шунингдек, у қизни “келин қилиш” ҳақида гапириб, чиройли эканини айтиб, юзидан ўпиб қўйишни сўраб шилқимлик қилган. Қиз бу ҳолатдан қўрқиб, уйига кириб кетган ва бўлган воқеани онасига айтган. Шундан сўнг ота-онаси ҳуқуқни муҳофаза қилувчи органларга мурожаат қилган.
Суд мажлисида эркак айбини тан олиб, ҳодиса вақтида маст бўлгани сабабли ўз ҳаракатларини назорат қила олмаганини билдирган. 2026 йил 9 февраль куни Жиноят ишлари бўйича Чиноз туман суди уни Маъмурий жавобгарлик тўғрисидаги кодекснинг 41-1-моддаси 1-қисми билан айбдор деб топиб, 3 сутка маъмурий қамоқ жазоси тайинлаган.
