Роскомнадзор Telegram’ни чеклаш бўйича дастлабки қадамларни қўйди
“Роскомнадзор” Россияда Telegram фаолиятини чеклашни бошлади. Бу ҳақда IT-саноатидаги ва тегишли идоралардаги манбаларга асосланиб “РБК” хабар берди.
Сўнгги кунларда россиялик фойдаланувчилар мессенжерга киришда муаммоларга дуч келаётганларидан шикоят қилишмоқда. Доwндетеcтор ва “Сбой.рф” хизматлари маълумот беришича, фойдаланувчилар асосан медиа файлларни юклаш ва хизмат тезлигининг пасайиши билан боғлиқ муаммолар ҳақида хабар берган.
Нашрга кўра, “Роскомнадзор” 10 февраль, сешанба кунидан бошлаб хизмат фаолиятини қисман чеклашни режалаштирган. Яна бир манба Telegram’ни секинлаштириш чоралари аллақачон қўлланилаётганини таъкидлаган.
Ваколатли органларнинг қарорига кўра, “Роскомнадзор” Россия қонунчилигининг бажарилишига эришиш ва фуқаролар ҳимоясини таъминлаш мақсадида изчил чекловлар киритишни давом эттиради, дейилади хабарда.
Аввал ҳам “Роскомнадзор” мессенжерларга нисбатан аниқ чекловлар киритган эди. Жумладан, 2025 йил август ойида Telegram ва WhatsApp орқали қўнғироқлар чекланди. Ўшанда идора буни мессенжерлар фирибгарлик, товламачилик ва фуқароларни қўпорувчилик ҳамда террорчилик фаолиятига жалб қилишнинг асосий воситаларига айланганини сабаб қилиб кўрсатган эди.
