АҚШ Норвегияда “Гавана синдроми” билан боғлиқ қурилмани синовдан ўтказган
The Washington Post маълумотига кўра, АҚШ Марказий разведка бошқармаси (МРБ) ва Пентагон Норвегияда “Гавана синдроми” билан боғлиқ махфий қурилмани текширган.
Нашр манбаларига таяниб хабар беришича, Норвегия ҳукуматига алоқадор олим кучли микротўлқин энергия импульсларини чиқара оладиган қурилма яратган. У 2024 йилда уни ўзида синаб кўрган ва “Гавана синдроми”га ўхшаш аломатларни ҳис қилган. Олимнинг шахси ошкор этилмаган.
Ҳисоботга кўра, 2024 йилда Пентагон делегацияси қурилмани баҳолаш учун Норвегияга борган. Шу йил декабрида эса разведка ва Оқ уй расмийлари ҳам ушбу масала юзасидан музокаралар ўтказган.
Бироқ синов натижалари билан таниш шахслар норвегиялик олим бошдан кечирган таъсирлар классик “Гавана синдроми”дан фарқ қилишини таъкидлаган. Шунингдек, бу ҳолат мазкур синдром чет эл душманлари томонидан махфий қурол қўлланганини исботламаслиги айтилган.
Оқ уй Миллий хавфсизлик кенгашида биотаҳдидлар масаласини бошқарган собиқ амалдор, генерал Пол Фридрихснинг фикрича, йўналтирилган энергия қуроллари инсон саломатлиги учун турли хавфлар туғдириши мумкинлиги ҳақида ишончли далиллар мавжуд.
