Кичик жонивор — катта фалокат: уйни кул қилган ёнғин
АҚШнинг Флорида штатида содир бўлган ноодатий ҳодиса туфайли турар жой биноси бутунлай ёниб кетди. Бу ҳақда WMBB телеканали хабар қилди.
Маълумотларга кўра, Дэвис–Банта оиласи ярим тун атрофида уй томонидан келаётган ғалати шовқинни эшитган. Донни Банта аввал тушунарсиз товушни пайқаган, ортидан эса куйган ҳидни сезиб, дарҳол рафиқаси Стейси Дэвис ва икки фарзандини уйғотган.
Ота-она шошилинч равишда зарур буюмларни жамлаб, болаларни ҳамда уй ҳайвонлари — ит ва мушукни хавфсиз жойга олиб чиққан. Ёнғин ўчирувчилар қисқа вақт ичида етиб келганига қарамай, алангани тўхтатиб қолишнинг иложи бўлмаган ва уй тўлиқ ёниб кетган.
Текширув давомида маълум бўлишича, олмахон уй томига чиқиб, электр симларини кемирган. Натижада қисқа туташув юзага келиб, ёнғин келиб чиққан. Оила аъзолари жароҳат олмаган, бироқ деярли барча мол-мулкидан айрилган.
