63 квадриллион фунтлик бойлик: қаҳвахона хатоси барчани ҳайратга солди
Sophie Downing исмли британиялик аёл техник носозлик сабаб бир неча дақиқага сайёранинг “энг бой инсонларидан бири”га айланиб қолди. Бу ҳақда The Standard нашри хабар қилди.
Ҳодиса Nottingham шаҳридаги машҳур 200 Degrees қаҳвахонасида содир бўлган. Софи у ерда матча-латте буюртма қилиб, тўловни 10 фунтлик совға картаси орқали амалга оширмоқчи бўлган. Бироқ тўловдан сўнг чоп этилган чекда картанинг қолдиғи сифатида ақл бовар қилмас сумма — 63 011 900 191 687 378 фунт стерлинг кўрсатилган.
Таққослаш учун, бу рақам дунёдаги энг бой инсонлардан бири — Elon Musk бойлигидан ҳам минглаб марта юқори.
Софининг айтишича, бу маблағ фақат қоғозда акс этган бўлса-да, у бир неча дақиқа давомида “энг бой аёл” сифатида ўзини тасаввур қилишдан завқ олган. Қаҳвахона ходимлари ҳам чекдаги улкан рақамларни кўриб, ҳайратларини яшира олмаган.
Тадбиркорлик билан шуғулланадиган Софи бу ҳолатдан ҳеч қандай ғаразли мақсадда фойдаланмаслигини таъкидлади ва совға картасидаги ҳақиқий қолдиқдан фойдаланиб, яна бир ичимлик харид қилган.
Кейинчалик қаҳвахона вакиллари ҳолатга расмий изоҳ бериб, хатолик касса тизимидаги техник носозлик туфайли юз берганини маълум қилди. Маълум бўлишича, совға картасининг номинал қиймати киритилиши лозим бўлган жойга унинг кўп хонали идентификация рақами ёзиб юборилган.
