“Реал Мадрид”нинг собиқ ярим ҳимоячисига ўлдириш билан таҳдидлар кўпайган. У нима гуноҳ қилди?

Испаниянинг “Реал Мадрид” ва Италиянинг “Интер” клублари собиқ ярим ҳимоячиси Уэсли Снейдер Винисиус Жуниор ва Жанлука Престианни ўртасидаги можаро ҳақида гапирганидан сўнг, ўлдириш билан қўрқитувчи таҳдидлар олаётганини маълум қилди.

“Престианни ҳеч қачон буни тан олмасди, агар шундай деган бўлса ҳам. Лекин бу даҳшат. Фикримни очиқ айтганим учун ўтган ҳафта Аргентинадан 4000 та ўлим билан қўрқитувчи таҳдидлар юборишди ва мени ўлдирмоқчи бўлишди. Ҳар ким ўз фикрига эга бўлишга ҳақли. Мени қўрқитаётганларнинг ҳам ўз қарашлари бор. Менинг ҳам кўраётганларимга асосланган ўз фикрим бор”, дейди нидерландиялик мутахассис.
Снейдер, шунингдек, “Бенфика”нинг футболчини ҳимоя қилишга уринишлари фойдасиз эканини қўшимча қилди:

“Менимча, “Бенфика”дагилар ҳам бу йигитни жавоб ўйинига олиб кетмаслик керак, деб ўйлашган. УЕФА ҳам шундай йўл тутди — уни ҳимоя қилиб, сўнг терговни давом эттиришмоқчи. Бироқ улар узоққа бора олишмайди. Ҳамма нарса унга қарши бўлса-да, инкор этиб бўлмайдиган далилларни топиш имконсиз”.
Ўтган ҳафтада Мадрид жамоаси Чемпионлар лигаси 1/8 финалига чиқиш учун кечган биринчи ўйинда Португалия клубини 1:0 ҳисобида мағлуб этган эди. Ўйиннинг иккинчи бўлимида “қироллик клуби” вингери Винисиус Жуниор ҳакам Франсуа Летексе билан суҳбатда Престианни оғзини формаси билан ёпиб, уни “маймун” деб ҳақорат қилганини айтган. “Бенфика” вингери эса ўз навбатида бразилиялик футболчини ирқий камситмаганини даъво қилди. УЕФА аргентиналик футболчини вақтинча четлатди.

Ушбу ҳолатга изоҳ берар экан, Снейдер шундай деган эди:
“Жанлуканинг жамоадаги қора танли шериклари бунга қандай муносабатда бўлишади? Агар у айбини тан олса, ундан қутулиш керак. Виниснинг реакциясига қараб айтиш мумкинки, у ҳеч нарсани тўқиб чиқармаган”.
Аввалроқ Жанлука Престианни УЕФА томонидан дисквалификация қилингани хабар берилган эди. Текширув тўлиқ якунлангач, унга нисбатан қатъийроқ жазо чораси қўлланилиши мумкин.

Маълумот учун, Уэсли Снейдер фаолияти давомида “Реал”, “Интер”, “Аякс”, “Галатасарой” ва “Ал-Гарафа” жамоаларида тўп сурган. У клуб ва терма жамоа сафида жами 576 та учрашувда майдонга тушиб, 154 та гол ва 146 та голли узатмани амалга оширган.

У УЕФА Чемпионлар лигаси, Ла Лига, Италия А Серияси ва клублар ўртасидаги Жаҳон чемпионатида зафар қучган. Нидерландия терма жамоаси таркибида 2010 йилги Жаҳон чемпионатида кумуш медални қўлга киритган ва 5 та гол билан мусобақа тўпурари деб топилган.