Ҳакамлар жанг тақдирини ҳал қилмаслиги керак!!!
«Бавария» бош мураббийи Венсан Компани ўйиндан кейинги флеш-интервьюда учрашув натижаси ва ҳакамларнинг қарорларидан кескин норози эканлигини билдирди. Бельгиялик мутахассис унинг жамоаси парижликларга ўз режаларини амалга оширишга йўл қўймаганини, қарама-қаршилик тақдирини рақибнинг устунлиги эмас, балки баҳсли вазиятлар ҳал қилганини таъкидлади.
— Қайсидир жиҳатда имкониятни бой бердик, деган фикрга қўшилмайман. «ПСЖ» ўз устунликларини намойиш эта олмади, чунки биз тўпни жуда яхши назорат қилдик. Тез-тез хавфли вазиятлар яратдик, аммо ҳал қилувчи паллада меҳмонлар ҳимояланишга улгуришди.
Ҳакамликка келсак, тўпнинг қўлга тегиши борасида бизнинг фикримиз бутунлай бошқача. Конрад Лаймернинг қизил карточка олишидан олдин қоида бузганини тасдиқловчи бирорта ҳам кадрни кўрмадим. Агар сиз биздан анча яхшироқ ўйнаган жамоани кўрган бўлсангиз, демак, кўзингиз меникидан ўткирроқ экан — мен иккита тенг кучли жамоани кўрдим. Бундай ҳакамлик қарорлари ўйин тақдирини ҳал қилмаслиги керак. «Бавария» бу турнирда олти марта ғолиб чиққан ва мен ҳар доим ғалаба қозонишимиз мумкинлигини ҳис қиламан. Эҳтимол, келаси йили бундай майда деталлар бизнинг фойдамизга ҳал бўлар.
