Шавкат Мирзиёевнинг қариндоши Иккинчи жаҳон урушида 20 дан зиёд фашистни йўқ қилган — “TASS”
Шавкат Мирзиёевнинг амакиваччаси, Совет Иттифоқи қаҳрамони Ўрунбек Ёқубов Иккинчи жаҳон урушида 20 дан ортиқ вермахт аскарини йўқ қилгани маълум бўлди. Бу ҳақда архив ҳужжатлари билан танишиб чиққан TASS хабар берди.
Маълум бўлишича, Ўрунбек Ёқубов Одер дарёсидан ўтиш пайтида вермахтнинг 7 та қарши ҳужумини тўсиқ қўйишда ёрдам берган. У 31-ўқчи дивизия 248-ўқчи полки миномётчилар ротаси ҳисоб командири лавозимида хизмат қилган. 1944 йил февраль ойида Днепрни кечиб ўтишда душманнинг 15 та қарши ҳужумини уч кун давомида тўсгани учун Совет Иттифоқи қаҳрамони унвони билан тақдирланган. 1945 йил апрель ойида Ёқубов “Қизил Юлдуз” орденига сазовор бўлган.
“1945 йил 24 январда Штейне қишлоғидан ғарбда Одер дарёсини кечиб ўтишда Ёқубов ўз миномётидан отиш орқали ўқчиларни қўллаб-қувватлаб, уларнинг дарёни муз устидан кесиб ўтиши ва плацдармни эгаллашига кўмаклашди. Ўқчилар ортидан миномётларини ғарбий соҳилга кўчирган Ёқубов икки кун давомида плацдармни эгаллашга ҳаракат қилган душманнинг 7 та шиддатли қарши ҳужумини қайтаришда пиёда аскарларга ёрдам берди. Бу жанглар давомида ўз миномётидан отиш орқали душманнинг 2 та ўт очиш нуқтасини ҳамда йигирмадан ортиқ аскар ва офицерини йўқ қилди”, дейилади тегишли орденнинг мукофот варақасида.
Бундан ташқари, Ёқубов “Жасорат” ва “Кавказ мудофааси учун” медаллари билан ҳам тақдирланган.
