Трамп Путин ва Цзинпин учрашувини қандай баҳолади?
АҚШ президенти Доналд Трамп Россия президенти Владимир Путин ва Хитой раҳбари Си Цзинпин ўртасида Пекинда бўлиб ўтган музокараларга муносабат билдирди. Америка етакчиси ушбу учрашувни ижобий баҳолаб, ҳар икки раҳбар билан ҳам яхши мулоқотга эга эканини таъкидлади.
Трампнинг айтишича, Путин ва Си Цзинпиннинг учрашуви халқаро сиёсатда муҳим воқеалардан бири сифатида кўрилиши мумкин. У ўз баёнотида ҳар икки давлат раҳбари билан “ажойиб муносабатлар” ўрнатганини қайд этди.
“Менимча, бу яхши. Иккала раҳбар билан ҳам ажойиб мулоқотдаман”, — деди АҚШ президенти. Шунингдек, у “ҳамма билан” яхши тил топиша олишига ишонч билдирди.
Эслатиб ўтамиз, Владимир Путин ва Си Цзинпин Пекин шаҳрида музокара ўтказиб, Россия ва Хитой ўртасидаги стратегик шериклик, икки томонлама ҳамкорлик ҳамда халқаро кун тартибидаги долзарб масалаларни муҳокама қилди.
Музокаралар аввалида Путин Москва ва Пекин муносабатлари “мисли кўрилмаган даражада юқори босқичга” чиққанини таъкидлади. У Россия ва Хитой алоқаларини “ҳақиқий ҳар томонлама шериклик намунаси” деб атади.
Қайд этилишича, Путиндан аввал Доналд Трамп ҳам 13–15 май кунлари Хитойга ташриф буюрган. Бу Америка президентининг 2017 йилдан бери Хитойга биринчи сафари бўлди.
