Владимир Зеленский Владимир Путинга очиқ хат йўллади
Украина Президенти Владимир Зеленский Россия етакчиси Владимир Путинга шахсий учрашув ўтказиш ва музокаралар вақтида ўт очишни тўхтатиш таклифи акс этган очиқ хат ёзди. Мактубнинг тўлиқ матни Украина Президентининг расмий сайтида эълон қилинди.
Зеленский Украина асирларни «ҳаммани ҳаммага» формуласи бўйича алмашишга, тинч аҳоли ва болаларни қайтаришга, шунингдек, хавфсизлик кафолатчилари сифатида АҚШ ва Европа иштирок этиши мумкин бўлган тўғридан-тўғри икки томонлама музокаралар олиб боришга тайёрлигини маълум қилди. У учрашувни нейтрал ҳудудда ўтказишни таклиф қилди ва фронт чизиғи дипломатия бошланадиган чизиққа айланиши кераклигини таъкидлади.
«Биз ўз одамларимизни йўқотяпмиз ва ҳар бир йўқотишимиз бизга азоб бермоқда… Сиз аллақачон мунтазам равишда, ҳар бир неча ойда бизнинг ҳудудларимизни, биринчи навбатда, Донецк вилоятини эгаллаб олишнинг сўнгги муддатларини ортга суриб келяпсиз. Сиз уни бу йил ҳам эгаллай олмайсиз.
Аммо биз Украинада доимий урушни хоҳламаймиз. Урушсиз ҳаёт беқиёс даражада яхши эканини жуда яхши биламиз. Биз бунга эришишни истаймиз. Ишончим комилки, россияликларнинг аксарияти бунга ижобий жавоб беришга тайёр ва сиз буни биласиз», — дейилади мактубда.
