Трамп Нетаньяхуни огоҳлантирди: «Барча яҳудийлар сендан чарчаган»
Янги китобда айтилишича, Трамп Ғазодаги ўт очишни тўхтатиш бўйича музокаралар чоғида Нетаньяҳуни кескин танқид қилган.
Журналистлар Мэгги Ҳаберман ва Жонатан Сваннинг янги китобига кўра, АҚШ президенти Дональд Трамп 2025 йилдаги телефон суҳбати давомида Исроил бош вазири Биньямин Нетаньяҳуга нисбатан кескин фикрлар билдирган.
«Ҳокимият алмашинуви: Дональд Трампнинг империявий президентлиги ичида» («Regime Change: Inside Donald Trump’s Imperial Presidency») китобида қайд этилишича, суҳбат Ғазода ўт очишни тўхтатиш бўйича музокаралар даврида бўлиб ўтган. Муаллифларнинг таъкидлашича, Трамп Нетаньяҳуга шундай деган:
«Биби, ҳамма сендан чарчаган. Барча яҳудийлар сендан чарчаган. Ҳатто бу суҳбатда иштирок этаётган икки яҳудий ҳам сендан чарчаган».
Нашрда келтирилишича, мазкур мулоқот 2025 йил сентябрида БМТ Бош Ассамблеяси вақтида бўлиб ўтган. Ўша пайтда Трамп Ғазодаги урушни тўхтатиш ва ҳудудни тиклаш бўйича 20 банддан иборат режани илгари сурган.
Муаллифларнинг ёзишича, Трамп Нетаньяҳуга Вашингтон таклиф қилган ўт очишни тўхтатиш келишувини рад эта олмаслигини ҳам айтган.
Китобда яна Трампнинг аввалроқ Нетаньяҳуни «фирибгар» деб атагани ҳақида ҳам сўз боради. Шунингдек, у Исроил бош вазирига муносабатига қарамай, ўзини «Исроилнинг энг яхши дўсти» деб таърифлагани қайд этилган.
Бироқ муаллифлар таъкидлашича, китобда келтирилган бу даъволар на Трамп, на Оқ уй, на Нетаньяҳу ва на Исроил бош вазири девони томонидан расман тасдиқланган.
