Жаҳон ОАВ Трампнинг миллиардлаб долларлик даромад декларациясига муносабат билдирди
АҚШ президенти Дональд Трамп 2025 йил учун мажбурий йиллик молиявий декларациясини эълон қилди. Ҳужжатга кўра, у фақат криптовалюта билан боғлиқ фаолиятдан тахминан 1,2 миллиард доллар даромад олган. Бу маълумот халқаро оммавий ахборот воситаларида кенг муҳокамаларга сабаб бўлди.
The Guardian нашрининг ёзишича, Трамп 2025 йил бошида АҚШни «дунёнинг крипто пойтахти»га айлантириш ниятини билдирган эди. Нашр қайд этишича, президент сармоя киритган криптовалюта компанияларининг аксарияти аввал стартап бўлган, аммо бугунга келиб улардан олинаётган даромад Трампнинг ўнлаб йиллар давомида шаклланган кўчмас мулк бизнесидан ҳам ошиб кетган.
The New York Times эса бу ҳолатни Америка президентлиги тарихида мисли кўрилмаган воқеа деб баҳолади. Нашрнинг таъкидлашича, аввалги президентлар манфаатлар тўқнашувига олиб келиши мумкин бўлган бизнес алоқаларидан узоқ туришга ҳаракат қилган. Газета Трамп ва унинг оиласи эса мутлақо тескари йўл тутганини таъкидлаб, «Трамп оиласи ўзининг агрессив фойда олиш йўлидан уялмайди», деб ёзди.
Le Figaro нашри Дональд Трамп криптовалюта соҳасига сармоялари туфайли манфаатлар тўқнашувида айбланаётганини қайд этди. Газетага кўра, инаугурациядан кейин у соҳадаги тартибга солиш талабларини юмшатиш бўйича бир қатор чораларни амалга оширган, бу эса криптоактивлар қийматининг ўсишига хизмат қилган. Шунингдек, Трамп Coinbase каби оммавий савдодаги криптовалюта компаниялари акцияларидан ҳам миллионлаб доллар даромад олгани айтилди.
India Today эса АҚШнинг 1978 йилда қабул қилинган қонунига мувофиқ президент ва вице-президент ўз даромадлари ҳамда активларини декларация қилиши шартлигини эслатди. Нашрга кўра, Трампнинг криптовалюта соҳасидаги фаоллиги унинг шахсий бойлигини кескин оширишда муҳим омил бўлган. Forbes маълумотларига кўра, унинг бойлиги 2024–2026 йиллар оралиғида 2,3 миллиард доллардан 6,5 миллиард долларгача ўсган.
Айни пайтда, Оқ уй матбуот котиби Анна Келли барча танқидларни рад этди.
«Президент ҳам, унинг оиласи ҳам ҳеч қачон манфаатлар тўқнашувига дуч келмаган ва келмайди. Президент Трамп АҚШни дунёнинг крипто пойтахтига айлантириш бўйича қабул қилинган қарорлардан фахрланади. Президент ва унинг маъмуриятининг ҳар бир ҳаракати Америка халқи манфаатларига хизмат қилади», — деди у.
