Россия НАТО учун энг катта узоқ муддатли таҳдид
НАТО бош котиби Марк Рютте Анқарада бўлиб ўтаётган саммитда Россияни Альянс учун ҳозирги ва узоқ муддатли энг асосий таҳдид деб атади.
«Россия ҳозир ҳам, узоқ истиқболда ҳам энг катта таҳдиддир», — деди Рютте. У бу фикрини Россиянинг Украинага қарши уруши ва Москва ҳарбий қудратини кучайтираётгани билан изоҳлади.
«Биз Украинага қарши ақлга сиғмайдиган тажовузкор урушни кўряпмиз. Унда Путин 35 минг нафар ўз аскарини қурбон қилишга тайёр», — дея қўшимча қилди НАТО бош котиби.
Рютте, шунингдек, НАТО учун хавф-хатарлар фақат Россия билан чекланмаслигини таъкидлади.
«Россия Шимолий Корея, Эрон ва Хитой билан ҳамкорлик қилмоқда. Айнан шу тўртлик биз дуч келаётган асосий узоқ муддатли таҳдиддир», — деди у.
Бу баёнот саммит якунлари бўйича қабул қилиниши кутилган Анқара декларациясига ҳам киритилади. 32 давлат элчилари маъқуллаган ҳужжат лойиҳасига кўра, Россия «Евроатлантика хавфсизлиги ва барқарорлиги учун узоқ муддатли таҳдид» сифатида баҳоланади.
Рютте ўз чиқишида Туркиянинг НАТО учун стратегик аҳамиятига ҳам алоҳида тўхталди.
«Туркия НАТО учун ниҳоятда муҳим давлат. Сизлар Альянсдаги энг кучли армиялардан бирига эгасизлар — яхши жиҳозланган ва юқори даражада тайёрланган қўшинларга», — деди НАТО бош котиби.
