Ҳормуз бўғози орқали кема қатнови энг паст даражага тушди
Бўғоз яна ёпилгани ҳақидаги эълондан сўнг тижорат кемалари ҳаракати можаро бошланганидан бери энг паст кўрсаткичлардан бирига тушди.
АҚШ ва Эрон ўртасидаги янги кескинлик фонида Ҳормуз бўғози орқали тижорат кемалари ҳаракати яна деярли тўхтаб қолди.
Эрон Ислом инқилоби қўриқчилари корпуси (ИИҚК) денгиз кучлари хавфсизлик билан боғлиқ вазият ёмонлашгани сабабли Ҳормуз бўғози алоҳида кўрсатмага қадар ёпилишини маълум қилди. Теҳрон бу вазиятни хорижий ҳарбий аралашув билан боғламоқда.
ИИҚК баёнотига кўра, АҚШ ҳарбийларининг аралашуви тўхтатилиб, қирғоқбўйи давлатларининг ҳудудий сувлардаги суверен ҳуқуқлари тан олинганидан кейингина кема ҳаракати қайта тикланиши мумкин. Шунингдек, Эрон кучлари рухсатсиз бўғоздан ўтишга урингани айтилган икки кемани тўхтатганини билдирди.
Kpler таҳлил компанияси маълумотига кўра, сўнгги бир сутка ичида Ҳормуз бўғози орқали атиги 14 та тижорат кемаси ўтган. АҚШ, Исроил ва Эрон ўртасидаги можаро бошланишидан аввал бу кўрсаткич ўртача кунига 130 та кемани ташкил этарди.
Можаронинг энг фаол босқичида кема ҳаракати 90 фоиздан ортиққа қисқарган. 14 июнь куни Вашингтон ва Теҳрон ўртасида эришилган келишувлардан кейин қатнов аста-секин тиклана бошлаган ва кунига ўтаётган кемалар сони 70 тадан ошган эди.
Бироқ янги зарбалар ва кемаларга қилинган ҳужумлар ортидан ҳаракат яна кескин камайди. Қиёс учун, 10 июль куни бўғоздан 20 та, 11 июль куни эса 24 та тижорат кемаси ўтган. Июн ойидаги келишувлардан кейинги энг юқори кўрсаткич 24 июнь куни қайд этилган бўлиб, ўшанда бўғоз орқали 76 та кема ҳаракатланган.
Сўнгги бир суткада бўғоздан ўтган кемалар орасида тахминан 2 миллион баррель Эрон нефтини ташиган Humanity танкери ҳам бўлган. Яна икки кема ҳар бири тахминан 500 минг баррель оғир нефть маҳсулотларини ташиган. Қолган кемаларнинг аксарияти, тахминларга кўра, юксиз ҳаракатланган.
Бўғознинг қайта ёпилиши ортидан ушбу йўналиш орқали хом нефть экспорти амалда асосан Эрон етказиб беришлари билан чекланиб қолди.
Ҳормуз бўғози жаҳон энергетикаси учун энг муҳим транспорт йўлакларидан бири ҳисобланади. У ердаги ҳар қандай чеклов нефть ва газ етказиб беришда узилишлар ҳамда жаҳон бозорида нархлар ошиши ҳақидаги хавотирларни кучайтиради.
