Голливуд пандемиядан кейинги энг катта натижани қайд этди — касса $4,6 млрдга етди
Голливуд киноиндустрияси пандемиядан кейинги энг муваффақиятли ёзги мавсумни ўтказди. Reuters маълумотига кўра, 2026 йил май-август ойларида Шимолий Америка кинотеатрларида чипта савдосидан тушган маблағ 4,6 млрд долларга етди. Бу ўтган йилнинг шу даврига нисбатан 26 фоиз кўп.
Натижанинг ўсишида «Spider-Man: Brand New Day», Кристофер Ноланнинг «The Odyssey» фильми ва Pixar’нинг «Toy Story 5» анимацион картинаси каби йирик премьералар муҳим роль ўйнади. Шу билан бирга, «Backrooms», «Obsession» ва «The Devil Wears Prada 2» каби фильмлар ҳам томошабинларни кинотеатрларга жалб қилди.
Айниқса, ёшлар ва аёллар аудиториясининг кинотеатрларга фаол қайтгани индустрия учун муҳим сигнал бўлди. IMAX ҳам тарихидаги энг яхши касса натижаларидан бирини қайд этган, бунда «The Odyssey» катта ҳисса қўшган.
Мутахассислар 2026 йил якунида АҚШ ва Канадада умумий кино кассаси 10 млрд долларлик маррадан ўтиши мумкинлигини прогноз қилмоқда. Олдинда эса «Avengers: Doomsday» ва «Dune: Part Three» каби йирик премьералар бор.
