Путин Испанияга кўчиб кетишни орзу қилган
Путин 2004 йилда иккинчи муддатга қолмоқчи бўлмаган ва Испанияга кўчиб кетишни орзу қилган – Сергей Пугачёв.
1990-йилларда Борис Елцин ва унинг вориси Владимир Путинга яқин бўлган собиқ банкир ва сенатор Сергей Пугачёв DW’га махсус интервью берди.
Пугачёвнинг сўзларига кўра, Елцинни Путинни ҳокимиятга олиб келишга «оила» (Елциннинг атрофидагилар) кўндирган.
«Елцин Путинни унгача ҳеч қачон кўрмаганини тушуниш керак. Степашин ўрнига Путин бўлишини айтган ўша йиғилишгача. Ўшанда Степашин: Борис Николаевич, илтимос, ахир у ҳеч кимса-ку, сиз катта хато қиляпсиз, деган», — деб эслайди Пугачёв.
Олигарх Борис Березовский ҳам Путиннинг тайинланишини «хато ва ҳалокат» деб ҳисоблаганини айтади собиқ банкир: «Березовский менга бу хато, бу ҳалокат деганди. У ҳеч нарсага эришмаган одам. Уни у ердан (Давлат хавфсизлик қўмитаси) шунчаки қувиб чиқаришган. У ҳеч ким бўлмади, ҳеч нарсага эришмади. Березовский у пайтда уни нуқсонли одам деб айтганди», – дейди у.
Пугачёвнинг айтишича, Путиннинг ўзи ҳам ҳокимиятда узоқ қолмоқчи бўлмаган ва 2004 йилда иккинчи муддатга сайланишни истамаган. Путин пул топиб, Испанияга кўчиб кетишни режалаштирган.
«Нима учун дарҳол тотал ўғирлик бошланди? Чунки ўша пайтда у иккинчи марта президент бўлишига ишонмаган. Ҳақиқатан ҳам, гап икки йил ичида кимдир топилиши ва янги демократик сайловлар ўтказилиши ҳақида кетаётганди. Аммо вазият ўзгарди», — дея таъкидлади Пугачёв.
