«Биз бир вақтлар Эрдўғаннинг ҳаётини сақлаб қолганмиз, энди эса Туркия билан уруш бўлиши мумкин»
Биз бир вақтлар Эрдўғаннинг ҳаётини сақлаб қолганмиз, энди эса Туркия билан уруш бўлиши мумкин — Исроил диаспора ишлари ва антисемитизмга қарши курашиш вазири Амичай Чикли
Амичай Чикли Туркия президенти Ражаб Тоййиб Эрдўған ва Анқара сиёсатини кескин танқид қилди ҳамда ушбу мамлакат билан уруш бўлишини айтди. У бу ҳақда Бирлашган сиёсат бўйича Қуддус маркази (JCAP) тадқиқотининг тақдимотига бағишланган ёпиқ тадбирда айтиб ўтди.
Чиклининг таъкидлашича, тахминан, олти ёки етти йил муқаддам Моссад сўровига кўра ва бош вазир Бинямин Нетаняҳунинг розилиги билан Туркияга исроиллик шифокор юборилган. У Эрдўғанни оғир хасталикдан (хабарларга кўра, саратондан) даволаш учун жўнатилган. «Бугун яҳудийларга таҳдид қилаётган бу одам яҳудий туфайли, исроиллик туфайли, Бинямин Нетаняҳу ва Дэвид Барнеа туфайли яшаяпти ва нафас оляпти», – деди.
Чикли ўз нутқида Туркия нонкўрлик қилаётганини айтиб, уни кескин қоралади. Бу баёнот Исроил ва Туркия ўртасида кескинлик ортиб бораётган бир пайтда янгради.
«Сўнгги йилларда Туркияда юз берган энг йирик ер қимирлашида Исроил давлати туркияликларни қутқариш учун улкан делегация юборган эди. Шундан сўнг Туркиянинг кўрсатаётган нонкўрлигини ақлга сиғдириб бўлмайди. Биз ҳатто Эрдўғаннинг ҳаётини ҳам сақлаб қолганмиз. Шунинг учун бу кишининг ҳафсаласини жуда пир қилади», — деди исроиллик вазир.
«Эрдўған Яқин Шарқ минтақасига нисбатан империалистик, фанатик ва ирқчилик интилишлари нуқтайи назари, шунингдек, минтақадаги ҳар қандай номусулмон озчиликни этник тозалаш нияти ҳамда ҳаракатлари бўйича Гитлерга ўхшайди», — деди у.
Вазир Туркиянинг Қуддусдаги консулхонасини зудлик билан ёпишга чақирди. Шунингдек, у Исроилдан Туркия билан муносабатларни батамом тўхтатиши талаб қилди. «Биз Туркия билан урушга тайёргарлик кўришимиз керак. Бу тўғридан-тўғри денгиздаги тўқнашувлар кўринишида бўлиши мумкин», — дея қўшимча қилди вазир.
