Жо Байден саратонни даволаш туфайли жиддий заифлашган
АҚШнинг собиқ президенти Жо Байден саратон касаллиги ва уни даволаш жараёни оқибатида жиддий заифлашган. Шу билан бирга, қўлланилаётган терапия ижобий натижа бераётгани маълум қилинди. Бу ҳақда The Washington Post нашри собиқ президентга яқин манбаларга таяниб хабар берди.
Нашр маълумотига кўра, Жо Байден ҳозирги вақтда асосан оила аъзолари, яқин дўстлари ва кўп йиллик маслаҳатчилари даврасида вақт ўтказмоқда ҳамда жамоатчилик олдида жуда кам кўриниш бермоқда. Яқинларининг таъкидлашича, унинг ҳаёти касаллик туфайли кескин ўзгарган.
Хабарда айтилишича, Жо Байден ҳозиргача ўз номи билан сиёсий ёки хайрия ташкилотини тузмаган. Шунингдек, Делавэр штатида президентлик кутубхонасини ташкил этиш учун маблағ йиғиш ишлари ҳам қийин кечмоқда. Нашрга кўра, унинг 17 ноябрь куни чоп этилиши режалаштирилган хотиралар китоби тақдимоти ҳам саломатлиги сабабли хавф остида қолган.
Эслатиб ўтамиз, жорий йил май ойида шифокорлар Жо Байденга простата бези саратонининг тажовузкор шаклини ташхис қилган эди. Кейинроқ у даволанишни бошлаганини ва прогноз ижобий эканини маълум қилган. Ўтган ой эса саратон ҳужайраларини олиб ташлаш бўйича жарроҳлик амалиётини бошдан кечирган.
