Испания Сеута атрофида мигрантларга қарши денгиз тўсиғини ўрнатмоқда
Испания ҳукумати Марокашдан келаётган ноқонуний мигрантлар оқимини тўхтатиш мақсадида Сеута эксклави атрофида денгиз тўсиғини ўрнатиш ишларини бошлади. Бу ҳақда мамлакат Ички ишлар вазирлиги маълум қилди.
Маълумотга кўра, Фуқаролик гвардияси узунлиги 500 метр бўлган сузувчи тўсиқни ўрнатмоқда. Айнан шу ҳудуд орқали Марокашдан Сеутага энг кўп мигрантлар ўтишга уринган. Тўсиқ сув сатҳидан 30–70 сантиметр баландликда ва 1 метргача чуқурликда жойлаштирилади. Шунингдек, мазкур ҳудудда Испания ҳарбий-денгиз кучларининг буйлари ўрнатилади, бироқ кемалар ҳаракати учун махсус йўлак сақлаб қолинади.
Оммавий ахборот воситалари маълумотига кўра, чегарани кесиб ўтишга уринишлар чоғида камида 67 киши ҳалок бўлган. Уларнинг айримлари сувга чўкиб кетган, бошқалари эса тўлқинқайтаргич ва чегара тўсиғи ёнидаги тиғизликда босилиб қолган.
Испания Ички ишлар вазирлиги ҳисоб-китобига кўра, Сеутага 50 мингга яқин мигрант кириб келган бўлиб, уларнинг 48 мингдан ортиғи аллақачон Марокашга қайтарилган.
Бу орада Европа Иттифоқида Испанияга нисбатан сиёсий босим ҳам кучаймоқда. Иттифоқнинг 27 давлатидан 22 таси ички ишлар вазирларининг навбатдан ташқари йиғинини чақиришни талаб қилди. Улар қўшма мурожаатда мигрантларнинг мисли кўрилмаган оқими Европа Иттифоқининг ташқи чегаралари ишончлилигига шубҳа туғдираётгани ва ноқонуний миграциянинг янада кучайишига олиб келиши мумкинлигини таъкидлади.
