Google смартфон ишлаб чиқаришини Хитойдан тўлиқ олиб чиқмоқчи
Google корпорацияси смартфонлар ишлаб чиқаришини Хитойдан бошқа давлатларга тўлиқ кўчиришни режалаштирмоқда. Ixbt.com маълумотига кўра, компания етказиб берувчиларини 2027 йилга қадар смартфон йиғиш қувватларини Хитойдан бутунлай олиб чиқиш режаси ҳақида огоҳлантирган.
Сўнгги йилларда Google Хитойдаги ишлаб чиқариш занжирига қарамликни камайтириш мақсадида Ветнам ва Ҳиндистондаги қувватларини кенгайтириб келмоқда. Шунга қарамай, ҳозир ҳам компания смартфонларининг сезиларли қисми Хитойда йиғилади.
Манбаларга кўра, Google жорий йилда юқори тоифадаги Pixel смартфонларини ишлаб чиқиш, синовдан ўтказиш ва серияли ишлаб чиқариш жараёнларини Ветнамда муваффақиятли йўлга қўйган. Бу эса компаниянинг 2027 йилгача барча Pixel моделларини Хитойдан ташқарида ишлаб чиқариш режасини тезлаштирган.
Агар бу режа амалга ошса, Google смартфон ишлаб чиқаришини Хитойдан тўлиқ олиб чиққан иккинчи йирик глобал брендга айланиши мумкин. Бунгача Samsung ўз смартфонлари ишлаб чиқаришини Хитойдан бошқа давлатларга кўчирган эди.
Google учун бундай қарор қабул қилиш Apple’га нисбатан осонроқ экани ҳам қайд этилмоқда. Чунки Pixel смартфонлари Хитой бозорида расман сотилмайди ва компаниянинг ишлаб чиқаришни ушбу мамлакатда сақлаб қолиши учун жиддий бозор омили мавжуд эмас.
Шунингдек, Ветнамда Samsung томонидан аввалдан шакллантирилган смартфон ишлаб чиқариш ва етказиб бериш инфратузилмаси Google учун қўшимча қулайлик яратмоқда.
