Моуриньо Мессига таъсирли мурожаат йўллади
Мадриднинг «Реал» клуби бош мураббийи Жозе Моуриньо Аргентина терма жамоасидаги фаолиятини якунлаган Лионель Мессига мурожаат қилди.
«Интер Майами»нинг 39 ёшли футболчиси душанба куни миллий жамоадан кетишини расман эълон қилди. Португалиялик мутахассис Мессининг ижтимоий тармоқдаги хайрлашув постига муносабат билдирди.
«Ёрқин ва унутилмас халқаро фаолиятинг билан табриклайман. Сенсиз Америка Кубоги ҳам, Жаҳон чемпионати ҳам энди аввалгидек бўлмайди», — деб ёзди Моуриньо.
Лионель Месси Аргентина миллий терма жамоаси сафида 2005 йилдан буён тўп тепиб келди.
У 2022 йилда «альбиселесте» билан Жаҳон чемпионлигини қўлга киритди. 2026 йилги мундиалда эса Аргентина термаси билан финалга қадар етиб борди.
