Жанубий Кореяда тўрт нафар ўзбекистонлик террорчилик гуруҳини молиялаштиришда гумонланиб ушланди
Жанубий Кореяда Ўзбекистоннинг тўрт нафар фуқароси Суриядаги террорчилик гуруҳини молиялаштиришда гумонланиб қўлга олинди, дея хабар бермоқда Yonhap агентлиги.
Кванджу полицияси маълумотларига кўра, 2025 йилнинг апрель ойидан буён тўрт нафар ўзбекистонликдан бири БМТ Хавфсизлик кенгашининг 2022 йилдаги санкциялар рўйхатига киритилган «Катиба ат-Тавҳид вал-Жиҳод» террорчилик ташкилотига 6,3 млн вон ($4600) миқдоридаги криптовалюта юборган.
30 ёш атрофидаги эркак, шунингдек, худди шу даврда ушбу гуруҳдан криптовалюта олганликда ҳам гумонланмоқда. Тергов маълумотларига кўра, у ушбу маблағларга умумий қиймати 170 млн вон бўлган 11 та ишлатилган автомобиль ва иккита экскаватор сотиб олиб, кейинчалик уларни Сурияга юборган.
Текширувчиларнинг ҳисоблашича, гумонланувчи гуруҳ билан расмий алоқаларга эга бўлмаган. Шу билан бирга, у ташкилот аъзоси бўлган укаси алоқага чиққанидан кейин гуруҳни қўллаб-қувватлай бошлагани аниқланган.
Эркак Интерпол томонидан «қизил билдиришнома»га киритилганидан сўнг, апрель ойида қўлга олинган. Yonhap маълумотларига кўра, у эскирган автомобиллар экспорти билан шуғулланувчи компанияни бошқарган.
Ўзбекистоннинг қолган уч нафар фуқароси ишнинг бош фигурантига ёрдам беришда, жумладан, ишлатилган автомобилларни топишда гумонланмоқда. Полициядаги сўроқдан сўнг, уларга нисбатан қамоққа олиш билан боғлиқ бўлмаган эҳтиёт чоралари танланди.
