Пекин Эрон билан алоқалари сабаб Хитой компанияларига қўйилган АҚШ санкцияларига кескин қарши чиқди
Хитой Эрон билан алоқалари баҳонасида мамлакат компаниялари ва фуқароларига қарши АҚШ томонидан жорий этилган бир томонлама санкцияларга кескин норозилик билдирди.
Tasnim News хабар беришича, Хитой Савдо вазирлиги вакили Сюань Лин Пекин бундай санкцияларга қатъий қарши эканини ва улар халқаро ҳуқуқ нуқтаи назаридан ҳеч қандай асосга эга эмас, деб ҳисоблашини айтди.
Унинг таъкидлашича, АҚШ санкциялари давлатлар ўртасидаги нормал савдо-иқтисодий муносабатларга тўсқинлик қилмоқда. Шунингдек, бу чоралар энергетика хавфсизлиги ва глобал таъминот занжирлари барқарорлигига салбий таъсир кўрсатмоқда.
Хитой вакили Вашингтонни ўз ёндашувини зудлик билан ўзгартиришга ва Хитой компаниялари ҳамда фуқароларига нисбатан жорий этилган санкцияларни бекор қилишга чақирди.
Сюань Лин, шунингдек, АҚШнинг Хитой иқтисодиётидаги «номутаносиблик» ва «ортиқча ишлаб чиқариш қувватлари» ҳақидаги даъволарини Пекинга босим ўтказиш учун баҳона ҳамда протекционизм сифатида баҳолади.
Унинг сўзларига кўра, барча давлатлар кўп томонлама ҳамкорликни кучайтириши, глобал савдо ва таъминот занжирларининг барқарорлигини таъминлашга ҳаракат қилиши лозим.
