Оқ уй сайтидан мигрантларга қарши видеоўйин олиб ташланди
Оқ уй сайтидан мигрантларга қарши видеоўйин олиб ташланди. Аввалроқ уни Tetris танқид қилган эди.
Оқ уй сайтида пайдо бўлган «Девор қур» номли, Tetris ўйинига ўхшаш видеоўйин ҳозир мавжуд эмас. Унда ўйинчи АҚШ ва Мексика чегарасида девор қуриши керак бўлган. Ўйин тавсифида: «Чегарани яқинлашаётган оломондан ҳимоя қил», деган ёзув бўлган.
CNN хабар беришича, сентябрь ойи бошида Оқ уй сайтида пайдо бўлган ушбу ўйин кейинчалик сайтдан олиб ташланган.
Tetris компанияси мигрантларга қарши руҳдаги ушбу видеоўйинга алоқаси йўқлигини очиқ маълум қилди. Компания «ажратиш эмас, бирлаштириш кучига» ишонишини таъкидлади. Шунингдек, муаллифлик ҳуқуқларининг бузилиши масаласига «жуда жиддий» ёндашишини билдирди.
Оқ уй сайтидаги бошқа ўйинлар эса ҳозирча сақланиб қолган. Жумладан, «Илон» ўйини услубида яратилган RioRun ўйинида ўйинчи Рио-Гранде дарёсидан ўтишга уринаётган мигрантларни ушлаши керак. Ўйиндаги қаҳрамон Трампнинг чегара хавфсизлиги бўйича вакили Том Хоманга ўхшатиб ишланган.
