Германия мудофаа учун рекорд даражада — €140 миллиард ажратмоқчи
Берлин Россияга нисбатан сиёсатини янада қатъийлаштирмоқда. Германия 2027 йилда мудофаа соҳасига қарийб 140 миллиард евро йўналтиришни режалаштирмоқда. Бу қарор Украинадаги уруш давом этаётган ва Москва билан дипломатик музокаралар бўйича қарашлар кескинлашаётган бир пайтда қабул қилинмоқда.
Германия канцлери Фридрих Мерц Берлинда Европа Кенгаши раиси Антониу Кошта билан учрашувдан сўнг Москва Украинадаги урушни якунлаш бўйича жиддий музокараларга тайёр эканини кўрсатувчи белгиларни ҳозирча кўрмаётганини билдирди.
Мерцнинг таъкидлашича, Германия дипломатик ечимга эришишга интилишда давом этади. Бироқ унинг фикрича, Москва музокараларга тайёрлигини намойиш этмаётган экан, урушни дипломатик йўл билан якунлаш имконияти чекланганлигича қолмоқда. Канцлер Украинага ёрдам беришни урушни давом эттириш эмас, балки уни якунлашни тезлаштириш воситаси деб атади.
Антониу Кошта эса янада кескин фикр билдирди. У урушнинг давом этаётгани учун масъулиятни тўлиқ Россия зиммасига юклади ва Москвани ўт очишни тўхтатишга ҳамда музокаралар столига ўтиришга чақирди.
Дипломатик вазият мураккаблашаётган бир пайтда Берлин мудофаа харажатларини кескин оширмоқда. Германия мудофаа вазири Борис Писториус маълум қилишича, 2027 йилда мамлакатнинг ҳарбий бюджети махсус жамғарма маблағлари билан биргаликда 140 миллиард еврога яқинлашади. У бу харажатларни аҳоли, ҳарбий хизматчилар ва Германия иттифоқчиларининг хавфсизлиги кафолати деб атади.
Писториус Россия томонидан келаётган хавфни Германия ва Европа учун «реал, жиддий ва долзарб» деб баҳолади. Унинг таъкидлашича, Москва нафақат Украинада уруш олиб бормоқда, балки эҳтимолий келажакдаги можароларга тайёргарлик кўриш мақсадида қурол ишлаб чиқаришни ҳам оширмоқда.
Германия вазири Россия ойига тахминан 150 та қисқа ва ўрта масофали ракета ишлаб чиқара олишини билдирди. Унинг айтишича, уларнинг қарийб 80 таси Украинада қўлланмоқда, қолганлари эса Россия арсеналларини тўлдириш учун сақланиши мумкин.
Сўнгги ҳафталарда Берлин ва Москва ўртасидаги муносабатлар ҳам кескинлашди. Германия Лейпциг/Галле аэропортида портловчи қурилма олиб кетган дрон билан боғлиқ ҳодисада Россияни айблаб, бир қатор чораларни эълон қилди. Улар орасида Бонндаги Россия бош консулхонасини ёпиш ва Берлиндаги Рус уйи фаолияти бўйича келишувни бекор қилиш ҳам бор.
Москва бу айбловларни рад этди. Россия элчихонаси Лейпцигдаги воқеани «шошилинч тайёрланган провокация» деб атади. Россия ташқи ишлар вазири Сергей Лавров эса Германияни кескинликни кучайтиришда айблаб, Берлинда «яна уруш истаги пайдо бўлганини» билдирди.
Бунга жавобан Россия Санкт-Петербургдаги Германия Бош консулхонаси ҳамда Гёте институтининг Германия маданият марказлари фаолиятини тўхтатиш ҳақида қарор қабул қилди.
Шу билан бирга, Берлиннинг Россия ҳарбий таҳдиди ва Москва тинчлик музокараларига тайёр эмаслиги ҳақидаги баёнотлари Россия расмийларининг оммавий позициясидан фарқ қилади. Москва дипломатик йўл билан келишувга тайёрлигини билдирмоқда, бироқ ўз шартлари бажарилишини талаб қилмоқда. Киев ва унинг Европа иттифоқчилари эса бу талабларни мақбул деб ҳисобламайди.
Томонлар ўртасида давом этаётган ҳарбий қарама-қаршилик ва эҳтимолий гибрид операциялар билан боғлиқ айрим ўзаро айбловларни мустақил равишда тасдиқлаш ҳозирча имконсиз.
