Кубада йил бошидан бери 6-марта блэкаут юз берди
Кубада электр тармоғи яна тўлиқ узилди, орол бўйлаб миллионлаб одамлар электрсиз қолди. Жорий йилнинг январ ойидан буён мамлакатда электр тармоғининг тўлиқ ёки қисман ишдан чиқиши камида олти марта кузатилди, дея хабар бермоқда Associated Press.
Куба энергетика ва конлар вазирлиги электр таъминотини тиклаш бўйича протоколлар ишга туширилганини маълум қилган. Куба Миллий электр иттифоқи вакили Феликс Эстрада ҳам тизимни босқичма-босқич тиклаш ишлари бошланганини билдирган.
Кубанинг эскирган электр ишлаб чиқариш тизими йиллар давомида ёнилғи танқислиги ва инфратузилманинг яроқсизлиги сабаб жиддий босим остида қолиб келмоқда.
АҚШнинг январ ойида Кубага нисбатан жорий қилган энергетика чекловлари эса вазиятни янада оғирлаштирган. Мазкур чекловлар Куба иссиқлик электр станцияларини ишлатиш учун зарур ёнилғи ҳамда эскирган инфратузилмани таъмирлаш учун керак бўладиган эҳтиёт қисмларни импорт қилишини қийинлаштирган. Шундан буён Кубага фақат бир марта ёнилғи ташувчи танкер етиб келган.
